ماذا قالت شهرذاد فى غابر الزمن...لحاكم اول الزمن ؟؟؟؟.

تحكى شهرزاد....

ايها الشعب المسكون بالعفاريت والجنون ...هيجلكوا رئيس محقون بأفكار امريكيه
يمشى الفقير حافى ...ويخلى الغنى يركب طياره مكان العربيه

يشتت أفكار الوليه ..واليتيمه..والارمله
ببلوه ورزيه
يبرأ المخزوميه من السرقه ويصاحب الحرميه
وهيدى لكل واحد فيهم هديه....
واحد فى ايده الحديد وواحد فى ايده الدقيق وواحد فى ايده العلاج
وكل واحد معاه مسئوليه

يتحكم فى خلق الله ويعلى الاسعار ويفرض على الناس اسعار جزافيه
رئيس مش دارى بالدنيا ولا حاسس بالساعه والثانيه
ولا يفهم فى الكوسه والباميه
هيطلع عينكم يا غلابه وهيحكم بقانون ساكسونيا
فى ليله مش من الف ليله جت شهرزاد الزمن الى بتقول عليه
فقابلت واحد عامل او فلاح........المهم واحد من الشعب

سألته ..مالك !مضايق ومتغاظ من ايه؟؟.
قالها النهاردا واحد جاى يقولى احنا بلد مفيش فيها كوره وزعلان اوى
هو احنا عندنا صناعه ..عندنا زراعه
زعلان اوى ويقولى مفيش كوره
طيب اهوه الحكومه مضيعه كل فلوسها على الكوره عشان تتبسط
شوف الى بيلعب كوره بياخد كام ....وشوف العامل والفلاح ..الناس الى شايله البلد على اكتافها عايشين بالقوة بيكملوا عشاهم نوم
وواحد يجى يقول يخساره فين زمن الطرب
طرب ايه؟؟...م تشوف اكل عيالك الاول الى مش عارف تجيبه
ولا شوف هتربى عيالك ازاى مش لما اعرف اعيش الاول ابقى اسمع
طيب يا سيدى الدوله اهى عملالك فيديوهات كليب( الى هى الاغانى يعنى)
فيها الاسفاف ..والله دى دعاره علنى ..ألطف بينا يارب
طيب يا مدام بلدنا بلد النيل كانت بلد زراعى جم حولوها بلد صناعى قولنا ماشى
وبعدين لا صنعنا ولا زرعنا ........وفى الاخر رقصنا على السلم
وشباب طالع متعقد لا قدامه قدوه ولا امل ولا طموح..مهو قاعد عاطل
قاعد على القهاوى
هيعمل ايه؟؟؟عاوز يشتغل ويتعب بس فرص العمل للمحاسيب واصحاب النفوذ
والله انا عمرى م شوفت بلد المهندس فيها شغال فى مطعم ولا الدكتور بيبيع كشرى والمحاسب يبيع كولا فى القطر
اذا الطبقه المستنيره متبهدله ....يبقى احنا يا طبقه عامله لما نتبهدل ..عادى بقى
أأأأه..أأه من الانبطاح..هو دا الى زلنا وضيعنا
بناخد الاوامر بتاعتنا من بره
امريكا سيقانا مدام ملناش كمه .....الله عليه العوض
ومستنيين الفارس لما يجى يخلصنا من الى احنا فيه ..زمن الفروسيه انتهى
والله م يخلصنا من الى احنا فيه الا طوفان نوح...نقول يارب احنا هنعيش ليه؟؟
والدنيا سودا م يطلعلهاش نهار
بالراحه بس اهدا......انت لى متشائم كدا ؟؟.
انا متشائم؟...طيب هاتيلى حد متفاءل يقولى الحل ايه وانا مستنيه ومستنى الرد وانا ايدى على ايده
بس دا الى انا شايفه فيه حاجه غير كدا قولولى
فابتسمت ..وهنا ادركت شهرزاد الصباح فسكتت وسكت الفلاح الفصيح عن الكلام المباح