الى كل المهتمين بصناعة الاثاث بدمياط.....دعوه لانقاذ صناعة الاثاث

اكيد قريتوا العنوان وبتسألونى يعنى اى

الموضوع هقوله وهو عن فئه بتمثل اغلب سكان دمياط ...الناس الى شايله البلد دى

هما منتجين صناعة الاثاث بدمياط

مدينة دمياط والتى اقيمت بها المنشأت الصناعيه الصغيره (او الورش الصناعيه) لصناعة الموبيليا والى بتمثل الشريان الحيوى لشعب دمياط تقدر تقول كدا ماشيه بنظام السخره والعبوديه لمصلحة الاقطاعى الجديد (تاجر الموبيليا الكبير )0

مجموعه صغيره من كبار التجار يحتكروا تسويق منتجات الاثاث الى ابدعها المنتج الصغير وأنتجها بجهده وعرقه ودفع حق الدوله والمستحق (ضريبه عامه +ضريبة مبيعات )0

بعدين بكل بساطه يجى التاجر الكبير وياخد المنتجات دى وينسبها لنفسه تحت لافتة فى معرض كبيييييير بديكور شيك وعليه الاسم الى يجذب المشترى

موبليات الحوت ...التمساح .....الفيل(طبعا دى كلها اسماء وهميه .) الاسماء الحقيقيه مش هقدر اقولها طبعا ممكن لو قلتها الشاشه تنفجر من الرهبه

المهم يبدأ يعرضها ويحتكر تسويقها ويسطو على حق الملكيه الفكريه للمنتجين الصغار مقابل لقمه يرميها ليهم ويطلب منهم يحمدوا ربنا ويبوسوا اديهم وش وضهر انه هياخد تعبهم وعرقهم ويعرضوا فى معرضه تحت اسمه الكبير

المنتج الى عاوز يربى العيال ..ياكل ويعلم ويدى دروس خصوصيه و يجوز يجهز واذا كان شاب فى بداية حياته وعاوز يبنى نفسه

تكون النتيجه فى الاخر انه راضى وقابل

بعد كدا يجى التاجر الكبير يتحكم فى الاسعار عند البيع ويرفعها لاعلى ربح طبعا على حساب دورة الانتاج وتظهر دورات الكسادالى بتعانى منها هذه الصناعه ويدفع تمنها المنتجون الصغار

ومفيش مانع عند التجار انهم يستخدموا رؤس اموالهم فى انشطه تانيه ولحظة الغرق يقفزوا من السفينه

اما صناعة الموبيليا ونتجينها الصغار ......الى الجحيم

كل الكلام الى انا بقوله دا ...ايه المطلوب فى الاخر ؟؟!!0

المطلوب ان فئه بسيطه من الناس فى مدينة دمياط مهدور حقها وياريت نكون صوت ليهم انهم يقدروا ياخدوا حقهم

المطلوب هو حماية الملكيه الفكريه للمنتج الصغير وحماية جهده وعرقه باصدار فاتوره لكل منتج تسمى فاتورة المنشأ

يسجل فيها التكاليف وقيمة ضريبة المبيعات وقيمة الضريبه العامه والربح الذى يستحقه التاجر (السعر النهائى للمنتج)والربح الى هيعود على المنتج الصغير منه

دا بدل الفواتير المجهوله الى بيصدرها التاجر وممكن يتلاعب فيها حتى لا يؤدى حق الدوله المستحق

بامكانه ايضا ان يسطوا على حق الملكيه الفكريه للمنتج الصغير ويتاجر بجهده وعرقه ويرفع الاسعار بالتالى ظهور الكساد وتعزيزه

دا طلب كل المنتجين الى بيشتغلوا فى صناعة الاثاث

كل الى قدرت اعمله ..ويارب يكون ليه فايده اذا حد سمع ..انه اكتب البوست دا

فيه دعوه صادقه الى كل المهتمين بصناعة الاثاث بدمياط

لانقاذ صناعة الاثاث

وحتى لا يتحول المنتجون الصار فى هذه الصناعه وعددهم بالالاف الى رصيد جديد فى مستنقع البطاله وتعود على البلد بأثار اجتماعيه وسياسيه خطيره

كدا البوست خلص

ادعولى يلاقى اهتمام و م يكونش صوت فى ملطا